0
0
0
s2sdefault

O venres pasado fixeron o seu primeiro paseo de recoñecemento xunto a un experto de ADEGA, e volverán en outono para monitorizar o estado da flora, da fauna, e a calidade da auga.

Adopcion tramo rio Lagares Asociacion Erguete

As persoas usuarias da Asociación Érguete enfundáronse o venres o mono de traballo para patear e estudar durante toda a mañá un tramo do río Lagares. Ese espazo, tanto a auga como a vexetación que a rodea, son a súa responsabilidade desde que a entidade sumouse ao Proxecto Ríos de ADEGA, e adoptou o lugar para observalo e coidalo.

Esta é unha actividade máis no seu proceso dentro da entidade e que ten como obxectivo demostrarlles que, “con esforzo, todos e todas podemos contribuír a crear un mundo mellor”, explica a coordinadora da Asociación, Elvira Rivas. Segundo a experta este tipo de actividades son “moi satisfactorias”, nos procesos polos que pasan as persoas usuarias na entidade. “Sentir que axudan aos seus veciños e veciñas anímaos a continuar traballando para mellorar persoalmente”, afirma.

Adopcion tramo rio Lagares Asociacion Erguete 2

 

Para dous usuarios da entidade esta actividade está “moi ben”, xa que lles axuda “a deixar de pensar nas súas cousas por momentos”, e a aprender que o entorno que nos rodea “ten moito valor e debemos coidalo”. “Agora vemos as cousas doutra maneira”, afirman. Nunca antes tomaran mostras de auga, analizaran larvas de insectos, e trataran de recoñecer todas as especies vexetais que colorean a beira do río Lagares.

A actividade ubícase en dous programas de intervención da entidade, o Programa de Formación e Integración Social (PFIS), que traballa a mellora persoal con persoas que están a cumprir condenas en prisión en 2º grao penal, en 3º grao penal, en réxime de semiliberdade e/ou con medidas alternativas á privación de liberdade, e o programa de vivendas de apoio, no que usuarias e usuarios residen durante un ano en tres pisos que a Asociación ten en Vigo para deixar o consumo, e tratar de reconducir a súa vida.

A educadora social do PFIS, Ana Vázquez, explica que este tipo de programa funciona moi ben entre as persoas usuarias do seu programa porque reforza “os hábitos de coidado persoais”, indispensables para saír dun problema de adicción ou conduta, ademais de sumar “os hábitos de coidado ao entorno e ofrecerlles unha alternativa de ocio máis alá das substancias”. Agora, analizarán os datos en común na entidade, e volverán en outubro para seguir na súa actividade de estudo e observación. Despois entregarán todos os datos a ADEGA para que se sumen no Informe Anual sobre Ríos do Estado.

A actividade foi dirixida por Paco Bañobre, coordinado de grupos do Proxecto Ríos. Un programa coordinado por ADEGA e que ten como propósitos divulgar a situación ambiental dos nosos cursos fluviais, contribuír a incrementar a concienciación ambiental a través da participación cidadá e aportar solucións aos problemas asociados á auga e aos ríos, así como de convertese nun referente nos programas de educación e voluntariado ambiental. Na actualidade este proxecto está promovido pola Consellería de Medio Ambiente, Territorio e Infraestruturas a través dos organismos Augas de Galicia e Instituto de Estudos do Territorio.

O programa de vivendas está subvencionado pola Xunta de Galicia, Concello de Vigo, e o Fondo Social Europeo.

Adopcion tramo rio Lagares Asociacion Erguete 3

0
0
0
s2sdefault

A capital galega é unha das cidades europeas analizadas que mostra un maior crecemento na presenza da droga entre 2019 e 2020 segundo o informe do Observatorio Europeo das Drogas e as Toxicomanías. Tamén aumentou o consumo de alcol.

Presencia cocaina aguas residuais

A presenza de cocaína nas augas residuais de Santiago de Compostela é maior que antes da pandemia segundo o último informe do Observatorio Europeo das Drogas e as Toxicomanías. Como mínimo, a presenza de benzoilecgonina, o principal metabolito da cocaína, aumentou un 10% durante o 2020 respecto o 2019, un resultado que coloca a capital galega entre as cidades europeas estudadas cun maior incremento.

Estas cifras apoian a unha serie de observacións de varios países (Bélxica, Irlanda, España, Francia e Portugal) que, segundo se recolle no informe, apuntaban que o uso de cocaína “parecía aumentar durante a pandemia”, en relación a que os vendedores venden a droga en unidades máis pequenas e máis baratas que antes para adaptarse a redución dos ingresos durante a pandemia.

Para a coordinadora da Asociación Érguete, Elvira Rivas, estes datos mostran “máis que nunca”, que “nestes tempos tan duros que vivimos, a prevención é aínda máis importante que antes”. A traballadora social da entidade entende que a mellor maneira de loitar contra o consumo e os problemas adictivos é “unha aposta pola educación e por unha mellora da atención as persoas que sofren esta problemática”. “Cantos máis medios, interese e coñecemento teñamos mellor. Por iso, o primeiro paso para abordar este problema debe ser detectar a que se debe este incremento”, afirma.

O alcol tamén aumenta

A presencia de alcol nas augas residuais de Santiago de Compostela tamén aumentou respecto as cifras do ano pasado. Segundo o informe, o consumo desta bebidas diminuíu en media durante os primeiros meses da pandemia en Europa debido ao confinamento e a reducción do consumo de atracón en botellóns, pero, coa relaxación das medidas, a partir do verán o consumo repunta de maneira clara.

aumento consumo alcol

 

0
0
0
s2sdefault

Os rapaces reciben atención na entidade para mellorar cos seus problemas co consumo de substancias e conduta. Participan nun taller grupal sobre perspectiva de xénero para desenvolver un “pensamento crítico con todas as súas relacións”

xenero e desigualdade Asociacion Erguete

Os adolescentes usuarios do Programa de Formación e Integración Social (PFIS) da Asociación Érguete comezaron unha actividade para reflexionar sobre xénero e desigualdade que se prolongará ata o mes de xullo. “Queremos acompañarlles no seu proceso para que entendan este o proceso de construción do xénero como temática transversal no programa”, explican dende a entidade.

A través de cinco sesións os rapaces falarán dos roles de xénero e estereotipos, masculinidade, violencia, relacións de parella e sexualidade a través de diversas actividades e dinámicas de grupo para que “desenvolvan un pensamento crítico”.

En Érguete queren lembrar que esta actividade está integrada soamente por rapaces porque consideran que é “importante a intervención diferenciada con homes e mulleres”, para traballar diversos aspectos. “A desigualdade e discriminación de xénero están presentes en todos os campos da sociedade e só a educación pode cambiala”, reclaman as persoas profesionais detrás do PFIS.

Esta actividade e o programa están subvencionados pola Xunta de Galicia a través da Consellería de Presidencia, Xustiza e Turismo.

0
0
0
s2sdefault

15 estudantes de 1º da ESO entrevistaron esta mañá a profesionais e persoas usuarias da entidade

IE Rosalia Castro Asociacion Erguete

O alumnado de 1º da ESO do IES Rosalía de Castro asistiu hoxe a clase como xornalistas a unha rolda de prensa. Chegaron con ganas de preguntar e moita información nas súas costas para entrevistar a profesionais e persoas usuarias da Asociación Érguete. O seu obxectivo, aprender todo o posible das adiccións.

“É un tema ao que se lle debería dar máis importancia”, opina Andrea García antes da entrevista. Ela e os seus compañeiros están moi contentos de aprender sobre as adiccións desta maneira xa que “nunca na nosa vida fixemos de xornalistas. Coñecer xente e contar historias que axudan está moi ben”, reflexiona David García.

Comezaron a actividade cunha entrevista a dúas educadoras sociais e a un psicólogo da Asociación Érguete. Da súa man aprenderon o que é unha adicción, como identificala, e como loitar contra ela. Tamén souberon que hai menores, un pouco maiores ca eles, que actualmente traballan dentro do programa PFIS da entidade para deixar atrás as súas adiccións. A educadora Ana Vázquez valorou “moito” o nivel do cuestionario e animounos a que utilicen todo o que aprenderon para “axudar e ensinar ás persoas do seu entorno”.

Rematada esa entrevista máis teórica os rapaces e rapazas continuaron o seu traballo xornalístico falando con dúas persoas usuarias da Asociación. Primeiro cun dos residentes das vivendas de apoio o tratamento da entidade que trata de deixar a súa adicción despois de 25 anos consumindo, e despois cunha menor do programa PFIS que dende a cercanía da idade tratou de facerlles comprender o fácil que pode ser caer nunha adicción.

Agora os estudantes teñen por diante a tarefa de redactar estas tres entrevistas para compartir o contido con todos os seus compañeiros e compañeiras de instituto. Sempre coa axuda do instigador desta actividade que os convirte en xornalistas por un día, o seu profesor de lengua e literatura, Alberto Sacido.

0
0
0
s2sdefault

27 traballadoras e usuarias da Asociación e da Fundación comparten situacións de desigualdade que sufriron para lembrar que “aínda hai moito camiño por percorrer”

8M2021 ASOCIACION ERGUETE

As paredes de Érguete amenceron este 8M vestidas cos rostros de 27 mulleres. As traballadoras e usuarias da Asociación e da Fundación decidiron sacar a careta do silencio e denunciar desta maneira as situacións de desigualdade que sufriron ao longo da súa vida sen medo a ensinar a cara.

Con esta iniciativa as mulleres de Érguete queren lembrar que “hai moito camiño por recorrer para acadar unha sociedade en igualdade”. As situacións que denuncian afectan a todos os aspectos da vida dunha persoa.

"Antes de irche de paseo, faille a cea ao teu irmán e pásalle o ferro a camisa", "o meu médico díxome que non me daba anticonceptivos porque xa estaba en idade de ter fillos ", "atopeime con varios usuarios que non aceptaban as indicacións dunha muller", "recibín gabanzas dun home na rúa mentres se tocaba"... Estas son algunhas situacións que denuncian estas mulleres e que confirman que “ a nosa voz é máis precisa que nunca”.

Dende a entidade tamén queren aproveitar este acto para lembrar que as mulleres con adiccións sofren unha dobre discriminación: por ser mulleres e por ser consumidoras. Deste xeito, o tratamento nas condutas aditivas vese obstaculizado polas discriminacións sufridas por ambas vertentes. Explican que estas mulleres ademais de aguantar todos os prexuízos que existen na sociedade coas persoas con problemas de adiccións, teñen que loitar e pedir axuda nun sistema “que non está pensado para elas”. Remítense a un dato tan “significativo”, como que só unha de cada catro persoas que accederon a Red de Atención a las Adicciones (UNAD) durante o 2018 era muller